السنة وورق التصوير

نهاية السنة وورق التصوير

مع نهاية سنة وبداية سنة جديدة بتكتر الذكريات والتشبيهات، ذكريات م السنة اللى فاتت وتشبيهات للسنة أوعناوين عامة للسنة ككل، ووسط التشبيهات الكتير قررت أشبه السنة بـورق التصوير (ايوه بتاع المذاكرة ده فعلا اللي بتصوره قبل الامتحان وغالبا مش بتبص فيه، بس بتصوره عشان تريح ضميرك، أوبتعمل زىِّ وبتذاكر في ضهره) الورق ده اللى بيبقى نصه مسود ومش باين منه حاجة وكله شبه بعضه، ولو عدى عليه وقت يمكن متعرفش ده كان بتاع ايه.

والعكس على طول الكشكول اللى أنا كاتبه بايدى، مليان اسهم رايحة  وجاية ورسومات ع اليمين وشخابيط ع الشمال وخطى اللى محدش بيعرف يقراه غيرى، هو اكتر حاجة بميزها من أول مرة، وافتكر بتاع مادة ايه او كنت كاتبة امتى وليه، لانه ببساطة مختلف عن اى ورق تصوير حتى لو مش احسن خط ولا اجمل تنسيق.

ومع نهاية سنة وانا بحاول ابص على أيام السنة اللى فاتت بصعوبة بافتكر حاجات منها، وفيها حاجات كتير زى الورق المتصور المسود كله شبه بعضه ومش عارف اميز حاجة منه، وخايف بسهولة السنة اللى جاية تبقى زى اللى فاتت واللى قبليها كلها ورق تصوير شبه بعضه، مفيش حاجة تعلّمها او تميزها بيها، أصل الأيام شاطرة بتعرف تطبع نفسها على بعض.

 وفي الوقت اللي فيه بنشكر ربنا على أجندة خلصت وأجندة جديدة هتبتدي في حياتنا، ينفع بأدوات بسيطة تلون كل ورقة بيضة فيها، هي صحيح هيبقى فيها نفس المضمون اللي في الورق المتصور بس الفكرة في طريقة كتابتي للكلام، اكتب العنوان بالأحمر – بخطى الوحش برضو- واشخبط في النص وأغلط واشطب وارسم واعمل أسهم واختصارات محدش يفهمها غيري. وحتى ولو بقلم اسود بس، هتطلع-بكل عيوبها- احسن من ورق التصوير.

ميز أيامك وافتكر إن انهارده أنت بترسم ذكريات بكره، ومش بس وانت مستني الحلو في بكرة لكن كمان وانت شايف الحلو ده بطريقتك ومصدق فيه، حتى لو ف أصعب الأوقات (وسط امتحانات مثلا :) ) ينفع تلون يومك، تعمل عنوان لكل يوم (او لو انت زىّ بتحب تشوف الحاجة قدامك) تكتب ورقة وعلقها ع الحيطة، او تكتب بوست ع الفيس أو تتصور مع حد مأثر فيك (مش الصور اللى بتبقى فيها 7 متعرفهمش نطولك ف الصورة)، عبر عن اللى جواك بتاع كل يوم، اعمل لسته بالانجازات بتاعت الأسبوع أو الشهر اللى أنت فخور بيها أواللى لسه عاوز تعملها ولمها على بعض أخر السنة، م الاخر لو كل حاجة باينة سودة...لونها.

سنة جديدة "مميزة" مش ورق تصوير