ماتيجي نغلط في بعض

كنت مرة في الشارع وحضرت واحدة من امتع الخناقات الي ابتدت بواحد ببدلة بينزل من عربيته بسرعة وبييبص للجزء المخبوط في العربية اللي قصاده واللي تمنها كان باين انه غالي والعربية شكلها جديد والناس تجري تتلم عشان تتفرج وبعدين ينزل واحد تاني شكله محترم في نفسه كده من العربية المخبوطة ويبص على الخبطة بعصبية ويقول "ده مش سواقة بني ادمين ابدا دي" فالاول اللي كان متوتر قالو "من غير غلط لو سمحت انا مغلطش فيك انا مستعد اصلحها" فالتاني هدي وقالوا "منتا بص عملت ايه" فالراجل رد وقال "أسف هصلحالك" فالتاني قاله "لا خلاص" وطبعا لان الناس مش متعودين على خناقة بالشياكة دي ومش عارفين يحوشوا لان مفيش حاجة تتحاش فالناس كلهم مشيوا، بس تعالوا نفكر شوية هو ليه غلط اننا نغلط وهو ليه الغلط غلط؟

الحقيقة احنا كلنا عارفين اننا بشر وكلنا بنغلط و "من منكم بلا خطية" وان ما يجعلنا بشر هو اننا بنغلط ولابلابلاب، ولكن بنتجاهل ان ده بيتضمن انسان غلاط بيتعامل مع انسان غلاط زيه (مش قادر مقولش زبادي غلاط، سامحني انا ليا غلطاتي انا كمان) فطبيعي اننا نغلط.

المشكلة الحقيقة هي اننا احيانا كتير بنخاف نغلط يمكن لان اتعودنا انه بيكون فيه عاقب او احنا بنتكسف من الناس، وعشان الناس (اللي كلهم بيغلطوا) ميشاوروش علينا ويقولو اللي غلطوا اهم، او حتى عشان قدام نفسنا نبقي كويسين فبالتالي بنخاف نعمل اي حاجة حتى بنخاف نعمل الصح وبنخاف نتحرك من مكاننا لاحسن نغلط وبنبطل نجرب بحجة اننا بنسعى للكمال، بنخاف نشتري من السوق ليضحك علينا، بنخاف نتكلم لنتفهم غلط (وبنخاف نشير الكلام ده احسن ميجيبش لايكات) وهكذا يعني، فالحقيقة في مرات احنا لازم نغلط عشان نتعلم ولازم نغلط عشان نكسر حاجز الخوف ولازم نغلط عشان نعرف المجتمع انه احيانا مش غلط اننا نغلط.

وبعدين مين قال ان الناس الكويسين مبيغلطوش، لما تلاقي حد بيعمل حاجة وحريف فيها وخبرة اوي افتكر انه اكيد غلط كتير عشان يوصل لكده وافتكر مبدا سواقة المتوسيكلات اللي موقعش ميسوقش، احنا بنتباهي اننا معملناش ولا غلطة وده طبعا شئ عظيم انك تكون عملتها صح من اول مرة، بس المصيبة لتكون مجربتش اصلا لحسن تغلط.

دي مش دعوة للغلط لكن دعوة لتقبله واننا نحطه في مكانه العادي ونحط كمان الشخص اللي غلط في مكانه برضو، لانه ببساطه احنا مش ممنوعين من الغلط، ودعوة كمان اننا نضحك على اللبن المسكوب لانه خلاص اتسكب، ومش دعوي اننا منحسش بالندم اننا نسكباه او اننا نبطل نحاول نبقي كويسين (ونبطل نسكب اللبن ونكبر بقي)، وانا عارف ان الموضوع يبدو صعب لانه بيتلامس حاجات كتير، ولكني اؤكد ان الكلام ده لا يتعارض مع سياسة العقاب والاعتذار وسياسة الندم والفغران وسياسة حماية المستهلك او اي سياسة تاني محتاجة تدخل الموضوع، ولكن انا مع اننا نندم ولكن بالقدر المناسب اللي بتخلينا منعملهاش تاني ومش اكتر من كده ولا سنتي واحد ومع اننا نحط عقاب وقوانين للمخطئيين ولكن بلاش افوره، وان كوننا كلنا بغلط لا يعفيك من الاعتذار (لا طبعا اقف عوج واتكلم عدل) لكن يشجعنا اننا نقبل الاعتذار من الغلطان ونعرفهم غلطهم بالراحة (ومن غير مد ايد لو سمحت).